Genesis 11

Umphongolo waseBhabheli

1Umhlaba wonke wawulolimi lunye lokukhuluma okufananayo. 2Kwathi abantu belokhu betshudukela empumalanga, bafumana indawo evulekileyo eShinari basebesakha khona.

3Basebetshelana bathi, “Kasitshayeni izitina sizitshise kakhulu.” Babesebenzisa izitina endaweni yamatshe, lethara endaweni yodaka.

4Basebesithi, “Zwanini, kasizakheleni idolobho libe lomphongolo ofika emazulwini, ukuze sizenzele ibizo singaze sasabalala umhlaba wonke.”

5Kodwa uJehova wehla wazalibona idolobho kanye lomphongolo abantu ababewakha. 6UJehova wathi, “Nxa bengabantu banye bekhuluma limi lunye sebeqalisile ukwenza lokhu, pho kakukho okungabehlula.

7Zwanini, kasehleni siye phansi sisanganise ulimi lwabo bangabe besazwana.”

8Kanjalo uJehova wabahlakaza emhlabeni wonke, bakhawula ukwakha idolobho.

9Kungakho labizwa ngokuthi yiBhabheli – ngokuba khonapho uJehova wasanganisa ulimi lomhlaba wonke. Kusukela lapho uJehova wabahlakazela emhlabeni wonke.

Kusukela kuShemu kusiya ku-Abhrama

 10Lo ngumlando kaShemu: Eminyakeni emibili ngemva kwesikhukhula, uShemu esemdala okweminyaka elikhulu wazala u-Afazadi. 11Esezele u-Afazadi uShemu waphila okweminyaka engamakhulu amahlanu, njalo wayelamanye amadodana lamadodakazi.

12Kwathi u-Afazadi esephile iminyaka engamatshumi amathathu lanhlanu wazala uShela. 13Esezele uShela, u-Afazadi waphila okweminyaka engamakhulu amane lantathu, njalo wayelamanye amadodana lamadodakazi.

14UShela esephile iminyaka engamatshumi amathathu wazala u-Ebheri. 15Esezele u-Ebheri uShela waphila okweminyaka engamakhulu amane lantathu, njalo elamanye amadodana lamadodakazi.

16U-Ebheri esephile iminyaka engamatshumi amathathu lane wazala uPhelegi.

17Esezele uPhelegi u-Ebheri waphila okweminyaka engamakhulu amane lamatshumi amathathu, njalo wayelamanye amadodana lamadodakazi.

18UPhelegi esephile iminyaka engamatshumi amathathu wazala uRewu. 19Esezele uRewu uPhelegi waphila okweminyaka engamakhulu amabili lesificamunye, njalo wayelamanye amadodana lamadodakazi.

20Kwathi uRewu esephile iminyaka engamatshumi amathathu lambili wazala uSerugi. 21Esezele uSerugi uRewu waphila okweminyaka engamakhulu amabili lesikhombisa, njalo elamanye amadodana lamadodakazi.

22Kwathi uSerugi esephile iminyaka engamatshumi amathathu wazala uNahori.

23Esezele uNahori uSerugi waphila okweminyaka engamakhulu amabili, njalo wayelamanye amadodana lamadodakazi.

24UNahori esephile iminyaka engamatshumi amabili lesificamunye wazala uThera. 25Esezele uThera uNahori waphila okweminyaka elikhulu letshumi lesificamunye, njalo elamanye amadodana lamadodakazi.

26UThera esephile iminyaka engamatshumi ayisikhombisa wazala u-Abhrama, loNahori loHarani.

27Lo ngumlando kaThera: UThera wazala u-Abhrama, loNahori loHarani. Kwathi uHarani wazala uLothi.

28Kwathi uyise uThera esaphila uHarani wafa bese-Uri idolobho lamaKhaladiya, elizweni lokuzalwa kwakhe. 29U-Abhrama loNahori bathatha bobabili. Ibizo lomka-Abhrama lalinguSarayi, kwathi ibizo likamkaNahori linguMilikha; wayeyindodakazi kaHarani uyise kaMilikha kanye lo-Isikha. 30Kodwa uSarayi wayeyinyumba; wayengelabantwana.

31UThera wathatha indodana yakhe u-Abhrama, lomntanomntanakhe uLothi indodana kaHarani, lomalokazana wakhe uSarayi umfazi wendodana yakhe u-Abhrama, basuka bonke e-Uri lamaKhaladiya baqonda eKhenani. Kodwa bafika eHarani basebesakha khona.

32UThera waphila okweminyaka engamakhulu amabili lanhlanu, wafela eHarani.
Copyright information for NdeIBE